Nýir sérfræðingar hjá exMon

Hugbúnaðarfyrirtækið exMon hefur ráðið til sín þrjá nýja sérfræðinga, þau Magdalenu Wojtysiak, Þröst Almar Þrastarson og Þórdísi Hildi Þórarinsdóttur.


Magdalena Wojtysiak er frá Póllandi og starfaði áður sem sérfræðingur í verðmati á fyrirtækjum og fjárfestingum fyrir Union Investment-sjóðinn í Varsjá. Þar sá hún meðal annars um daglega útreikninga á verðmæti hreinnar eignar og yfirlit með fjárstreymi tengdu viðskiptum sjóðsins. Þar áður vann hún hjá Millennium fjárfestingarbankanum þar sem hún sá um samningagerð og millifærslur í alþjóðlegum viðskiptum.

 

Magdalena hefur líka unnið að hugbúnaðarþróun í banka- og fjármálastarfsemi og er með ISTQB-vottun í hugbúnaðarprófun. Þá hefur hún unnið hjá exMon í Póllandi við prófanir á gagnaflokkunarforritum. Magdalena er með meistaragráðu í stærðfræði frá Háskólanum í Lodz.

 

Þröstur Almar Þrastarson útskrifaðist með B.Sc.-gráðu í tölvunarfræði frá Háskóla Íslands nú í sumar. Hann starfaði sem framendaforritari í nýsköpunarverkefni í gegnum Nýsköpunarsjóð námsmanna sumarið 2021. Þar sá hann um hugbúnaðarþróun og framendaforritun fyrir minimum viable products. Hann starfaði hjá icelandiconline.com sumarið 2020 þar sem hann sinnti hugbúnaðarþróun í bakenda vefsíðunnar. Meðan á námi stóð tók Þröstur virkan þátt í Nörd, nemendafélagi tölvunar- og hugbúnaðarverkfræðinema við HÍ, og var þar skemmtanastjóri námsárið 2020–21. Þá tók hann þátt í Níunni, netöryggiskeppni íslenskra ungmenna, árið 2020.

 

Þórdís Hildur Þórarinsdóttir útskrifaðist með B.Sc.-gráðu í tölvunarfræði frá Háskóla Íslands 2017. Hún er með sérhæfingu í forritunarmálunum Java, Spring Boot, Git, JUnit, Docker og SOA. Hún hefur starfað í hugbúnaðarþróun hjá Infor í Svíþjóð frá 2019 við að þróa vettvang (e. platform) fyrir lýsigögn og örþjónustur. 

 

„Magdalena Wojtysiak er með mikla reynslu af störfum á fjármálamarkaði; bakgrunn í hugbúnaðarþróun og þekkingu og tengsl sem eiga eftir nýtast viðskiptavinum okkar afar vel,“ segir Gunnar Steinn Magnússon framkvæmdastjóri exMon. „Þórdís Hildur er gríðarlega reynslumikill og fjölhæfur forritari sem mikill akkur er í að fá til starfa. Þröstur Almar hefur þrátt fyrir ungan aldur sýnt fram á mikla færni sem á eftir að nýtast á mörgum sviðum,“ bætir hann við. „Þetta er frábær viðbót við exMon-teymið og eykur enn á þá miklu breidd sem er hér að finna, og við búumst við miklu af þeim á næstu árum.“

 

exMon er hugbúnaðarfyrirtæki sem framleiðir og þróar hugbúnaðinn exMon sem finnur villur eða frávik í tölvukerfum viðskiptavina til að koma í veg fyrir tekjuleka eða brotalamir í ferlum. exMon er dótturfyrirtæki Expectus á Íslandi, það var stofnað árið 2009 og starfa þar rúmlega 30 manns.

Hafðu samband

Fylltu út formið hér að neðan og við munum hafa samband eins fljótt og hægt er.

Contact Us

Expectus Finance stofnað

By Sigrún Anna • November 5, 2025
Á dögunum stofnuðum við fyrirtækið Expectus finance ásamt Heiðdísi Rún Guðmundsdóttur, Steinu M. Lazar Finnsdóttur og Sunnu Dóru Einarsdóttur sem allar störfuðu áður hjá Deloitte. Allar eru þær hluthafar í Expectus Finance. Sameiginleg reynsla þeirra spannar allt frá stjórnun fjármáladeilda og stefnumótunar til sjálfvirknivæðingar og innleiðingar á fjárhagskerfum. F yrirtækið var stofnað með það að markmiði að efla stuðning við fjármálasvið íslenskra fyrirtækja með ráðgjöf, þjálfun og þjónustu sem auðveldar fyrirtækjum að draga úr flækjustigi í daglegum rekstri. „Við sjáum að hefðbundin fjármálasvið verja of miklum tíma í bókhaldsverkefni – á kostnað þess að nýta tímann í að styðja stjórnendur með gögnum og innsæi sem auka arðsemi og vöxt. Það er leiðarljós okkar að brjóta upp þetta mynstur með nálgun þar sem ferlar, fólk og tækni vinna saman til að skapa raunverulegt virði fyrir fyrirtæki og stofnanir,“ segir Sunna Dóra Einarsdóttir , einn af stofnendum Expectus Finance. Expectus Finance býður upp á bestun fjármála- og rekstrarferla, vinnustofur, námskeið, tímabundnar mannaflalausnir fyrir allar stöður fjármáladeilda auk útvistunar á bókhaldi, launum og skýrslugerð. Félagið segir útvistunarþjónustuna byggja á markvissri notkun á tækni til að tryggja rauntímagögn og gera regluleg uppgjör einföld og skilvirk. Minni fyrirtæki geti einnig nýtt sér útvistaðan fjármálastjóra til að fá faglega yfirsýn án þess að ráða í fullt stöðugildi. „Það hefur orðið gríðarleg framþróun í fjárhags- og rekstrarkerfum á undanförnum árum, en þjálfun og notkun þeirra hefur ekki alltaf fylgt tækninni í sama takti,“ segir Sunna Dóra. „Þarna sjáum við stór tækifæri til að auka virði fjármálasviða með því að nýta kerfin til fulls. Saman búum við yfir djúpri þekkingu og reynslu af helstu fjárhagskerfum sem notuð eru á íslenskum markaði – þar á meðal Microsoft Business Central (BC), Microsoft Dynamics F&O, Oracle (Orri), Nav, Ax, DK, SAP, Reglu og Payday – og við sjáum að mörg fyrirtæki í einkageiranum og hjá hinu opinbera eiga enn mikið inni þegar kemur að því að hámarka notkun og þekkingu á þessum lausnum.“ Í dag starfa í kringum 25 sérfræðingar hjá Expectus og fyrirtækið hefur verið valið bæði Fyrirtæki ársins og Fyrirmyndarfyrirtæki VR síðustu ár. „Þetta er mjög ánægjulegt skref fyrir Expectus samstæðuna sem hefur frá árinu 2009 sérhæft sig í viðskiptagreind, rekstrarráðgjöf og stefnumótun. Við útvíkkum þjónustuna á sviði fjármála með stofnun Expectus Finance með djúpri sérþekkingu þeirra Sunnu, Heiðdísar og Steinu sem við væntum að skili enn meiri árangri fyrir okkar viðskiptavini,“ segir Reynir Ingi Árnason , framkvæmdastjóri Expectus og stjórnarformaður Expectus Finance. Í stjórninni sitja einnig Sunna Dóra og Ragnar Þórir Guðgeirsson, stofnandi og stjórnarformaður Expectus. Sunna Dóra Einarsdóttir var áður meðeigandi hjá Deloitte og starfaði þar í 14 ár, bæði í Danmörku og á Íslandi, m.a. sem fjármálastjóri og stýrði hún sviði Viðskiptalausna Deloitte. Hún hefur lokið MSc í Economics & Management frá Aarhus University og sinnt kennslu við Aarhus University, Copenhagen Business School, Háskólann í Reykjavík og Deloitte University í París. Heiðdís Rún Guðmundsdóttir starfaði áður sem Senior Manager hjá Deloitte og var þar áður vörustjóri hjá Icepharma hf. Hún er með MSc í Management frá Jönköping International Business School, auk þess að hafa klárað CFO Programme Deloitte hjá Henley Business School í London og sinnt kennslu við Háskóla Íslands.  Steina M. Lazar Finnsdóttir stýrði útvistunarsviði Deloitte og bar ábyrgð á gæðum og hagræðingu ferla ásamt því að hafa stýrt þjálfun starfsmanna sviðsins. Steina er með BSc í Viðskiptafræði frá Háskólanum á Akureyri og er einnig Viðurkenndur bókari frá Háskólanum í Reykjavík.

Þrjú ný til liðs við Expectus

By Sigrún Anna • October 21, 2025
Expectus hefur ráðið til sín þau Jón Bergmann, Sturlu Sæ Erlendsson og Sigrúnu Önnu Guðnadóttur. Jón Bergmann er ráðinn sem ráðgjafi í viðskiptagreind. Hann er með doktorspróf í kennilegri eðlisfræði frá Tækniháskólanum í Danmörku og meistaragráðu í efnafræði frá Háskóla Íslands. Jón hefur víðtæka reynslu sem gagnanörd, forritari og vísindamaður og hefur meðal annars starfað sem sérfræðingur hjá Controlant, Símanum og Veðurstofu Íslands. Þar leiddi hann meðal annars þróun á hugbúnaði fyrir greiningu og sjálfvirkni, auk þess að vinna með stórgagnalausnir og gervigreind. Sturla Sær Erlendsson er ráðinn sem ráðgjafi hjá Expectus. Hann er með B.Sc. gráðu í rekstrarverkfræði frá Háskólanum í Reykjavík og stundar nú meistaranám í framleiðsluverkfræði og stjórnun við KTH í Stokkhólmi. Sturla starfaði síðast hjá Icelandair sem sérfræðingur í Amadeus Queues og ferðaráðgjafi. Hann hefur einnig komið að rannsóknum á sviðsmyndagreiningu hjá Frumkvöðlasetri Íslands og á að baki frumkvöðlareynslu sem stofnandi og fatahönnuður fyrirtækisins/hönnunarfyrirtækisins Reykjavík Roses. Sigrún Anna Guðnadóttir er ráðin sem skrifstofustjóri Expectus. Hún er með meistaragráðu í markaðsfræði frá Háskólanum í Reykjavík og B.Sc. gráðu í viðskiptafræði frá sama skóla. Sigrún kemur til Expectus með áralanga reynslu úr bókhaldi, launavinnslu og rekstrarráðgjöf auk sérhæfingar í stafrænni markaðssetningu. Hún starfaði síðast hjá Datera sem sérfræðingur í stafrænni markaðssetningu og þar áður leiddi hún launadeild hjá Fastlandi. „Það er orðin krafa í nútímafyrirtækjarekstri að stjórnendur og starfsmenn geti tekið gagnadrifnar ákvarðanir byggðar á traustum rauntímaupplýsingum. Við hjá Expectus höfum síðastliðin 16 ár aðstoðað fyrirtæki og stofnanir landsins við val og innleiðingar á gagnalausnum sem styðja við þá vegferð og gerir þeim kleift að ná árangri hraðar en áður. Jón, Sturla og Sigrún eru frábær viðbót í öflugan hóp sérfræðinga hjá Expectus sem gerir okkur kleift að þjónusta okkar viðskiptavini af sama krafti og við höfum gert frá upphafi,“ segir Reynir Ingi Árnason, framkvæmdastjóri Expectus.